Nde juru mbyte (purahéi)

Ñe'ẽpoty: Emiliano Rivarola Fernández
Pumbasy: Mauricio Cardozo Ocampo
 
Nde juru mbyte! Parral ajúicha he'ẽ asýva,
maerã voípa aipó "eiretére" ñambojoja;
hykueremínte che korasõme remondykýva,
ha upeguivénte akãvaípe kóicha apyta.
Che angaiparãnte nipo ra'e ako pyharépe,
jerokyhápe, ñasaindymíme jajesape;[1]
aiko haĝuáma upeguivénte opa che képe,
che páype guáicha, nde jurumírente ajerure.
Nde juru mbyte! Rrósa poty pe ndejoguaitéva,
iñakynguépe amboguepáva y'uhéi asy;
ha hyakuãmínte, che mba'asygui che moingovéva,
aiko haĝua ko múndo porãme avy'a jevy.
Toimé oñe'ẽva, toimé ipochýva chéko ha'éma,
nde rakykuéri añehundíta kuñataĩ;
añaretãme achyryrýne, che akãme oikéma,
chéko amoñáta he'ẽ mbochýva nde jurumi.
Nde juru mbyte! Che mborayhúpe ohaitypóva,
kóina araháta ko che rembére ijeirakue,
ovy'aiténe hese okambúva, ambue yvypóra
la ambyasymíva nachemba'eitaha araka'eve.
Ha ahakuévo ku mombyrýma che rekoháre,
kóina araháta che angapýpe he'ẽnguemi;
ne ryakuãngue katu ikurusúta ko che syváre,
jepérõ nde nderesaráima anga chehegui.
Tovénte taha, taiko mombyry,
tajepy'apy amano meve;
ka'aguy mbytére che año peteĩ,
tahekarei, nde juru mbyte.


[1] Jajesape he'ise "jajehesape", oñemombykýva ojejapo háicha jepi ñe'ẽpotýpe.

www.guaranirenda.com - 2004

Péva mboyvegua Péva riregua