Yvoty reka Mariscal López rérape (ńe'ẽpoty)

Haihára: Darío Gómez Serrato
 
Ko'ẽmbota oĝuahẽma, che tupãsy, epu'ãke,
jaha umi ńu mbytére yvoty jaheka,
ko nde róga rokára taipoty verapáke
Mariscal López ára jarohory haĝua.
Nde sái ku iporãvéva, hovypa ha pytãva
ku pacholi meméva emonde ndejehe,
ha pe nde ati'y ári ehykuavo nde áva
kuarahy áĝa osẽvo tojaitypo ipype.
Vevehápe jaháta ńánde képerõ guáicha
ńánde rakykuerépe purahéi tahoky,
ha amónte ára ru'ãme ńaĝuahẽta guyráicha
Mariscal peĝuarãva yvoty jarojy.
Ńandejára oipotágui ńandéve ohendukáva
Mariscal López réra ndopavéima haĝua,
oĝuahẽne oĝuahẽva, ohasáne ohasáva!
opaite yvy ape ári ohesape va'erã.
Ahecha vaicha aína amoite Cerro Korápe
henda morotĩ ári kuarahýicha omimbi,
ikorasõ ipópe ko hetã rayhupápe
arasunu apytépe, huguýpe ońapymi!
Ko'ẽmbota oĝuahẽma, che tupãsy, epu'ãke,
yvoty iporãvéva jaheka ońondive,
ha nde róga rokára tahendy verapáke
Mariscal López réra ńesũhápe ja'e.

Ńenohẽ hágui: [ToR1:110] - www.guaranirenda.com - 2004

Péva mboyvegua Péva riregua