Korasõ rasy (ñe'ẽpoty)

Haihára: Darío Gómez Serrato
 
Arriveñomícha ko yvy apére
aiko aroguata che mba'e mbyasy,
ha chemandu'árõ ymave guarére
chemoangekoietéva korasõ rasy.
Chetyre'ỹmíguiko che ndaikuaávai
ni ndahupytývai ko sy mborayhu,
cheaño akakuaágui márõ ndatopávai
oĩ va'erã che ypýpe chemokunu'ũ.
Pyhare che ári hi'ãngue oitývo
oĝuahẽva chéve py'a tarova,
nahi'ãmivéima aipo cherorývo
ha upéicha vovénte asẽma aguata.
Ha che mbaraka chemoirũ maymáva
ndijavýiva péicharõ ipu'asyve,
ha peteĩ ñe'ẽme roñombyasyukáva
ogaguy porãme ojojaveve.
Upévare áĝa roĝuahẽ nde rópe
che puraheimíme romomyangekói,
rohayhu raságui ambue che pópe
che mbaraka sãicha che py'a añatõi.
Epáynte ko'áĝa ha ani ambue ára
ejechauka chéve nde che tupãsy,
cha jatuichaitéma ko nde rayhuhára
nde rechaga'úgui ikorasõ rasy.

www.guaranirenda.com - 2004

Péva mboyvegua Péva riregua