Juayhu pavẽ (ñe'ẽpoty)

Haihára: Félix Fernández
  
Reikuaárõ mombyrýgui kuatiámi apytépe
peteĩ taperekuére che kupy ojoja hague,
ysyry satĩ asýicha remokãvo nde rovágui
ehekýi nde pyti'águi: "Opa che rayhuhare".
Ikatu va'erã nga'u ndahypái ko mborayhu
oñemyatãva che pógui ne ñañágui chendive,
reikuaa va'erã upérõ che ñe'ã opytu'úvo
chendive omano hague upe nde rayhuhare.
Nahi'ãinte piko chéve reñomi nde py'apýpe
ñame'ẽ va'ekue jasýpe mokõive ñame'ẽ,
jajuejávo ko yvy ári peteĩ mba'e mbyasýpe
ndi'aréi opa yvyguýpe upe nde rayhuhare.
Ha opaitéva toikuaáke maichaitépa rohayhúva
nderehe che kunu'ũva, chemitã guive guare,
ajeívo upe nde ypýgui oiméramo oporandúva
ere ichupe reñandúva: "Opa che rayhuhare".

Ñenohẽ hágui: [ToR1:91] - www.guaranirenda.com - 2004

Péva mboyvegua Péva riregua