Guarani (ñe'ẽpoty)

Haihára: Darío Gómez Serrato
 
Avausu!, avausu!, heruĝuágui rejúva
ko yvy moingovévo, kuimba'e kakuaa!,
nde ruguy momorãvo kuarahy hendypúva
ha jasy nderekávo pyharérõ ohasa.
Nde va'ekue ku ymaite opaite mba'ejára,
yguasu nemba'e, ka'aguy ha yvyty,
ndepochy sapy'árõ osunúvami ára;
ha vy'ápe reimérõ, panambi ojeroky.
Eirarúva pajépe nde juru omohe'ẽva
reipo'órõ hesãiva mborayhu hechapy,
reguatárõ rehóvo guyra kuéra oñe'ẽva
ha tory ha vy'ápe nde rape ipoty.
Avausu tery'ẽ, tesaráipe reikóva!,
yvytu ha ysyrýre ne pyambu ñahendu,
nde tapýipe oĝuahẽma "arandu" ojeheróva
ha yvoty rendaguépe mba'asy jajuhu.

Ñenohẽ hágui: [ToR1:108] - www.guaranirenda.com - 2004

Péva mboyvegua Péva riregua