Eñohẽ nde resay (ñe'ẽpoty)

Haihára: Darío Gómez Serrato
 
Oĝuahẽ che korasõme ñesũhápe
ao hũme remondéva ne ñe'ẽ
rejapo va'erã ko'áĝa hayhupápe
eñohẽ nde resay ha eñembo'e.
Kuimba'e resay kurusuguýpe
omanóva rape ombopiro'y
ha peẽicha ojuayhu va'ekue ko yvýpe
peteĩ ára yvate ojuecha jevy.
Ndohoitéiko ndehegui upe rehayhúva
Ñandejára rehechávarõ añete
tupaõpe angapyhy rembojehúva
remano rire ĝuarã py'a rory.
Eikutu nde korasõ kyse yvyrápe
ha opupúva nde ruguýpe ejovahéi
ne rembireko omanóva rayhupápe
eñohẽ nde resay ha epurahéi.

Ñenohẽ hágui: [ToR1:103] - www.guaranirenda.com - 2004

Péva mboyvegua Péva riregua