Cherendumi Mária Ána (ñe'ẽpoty)

Haihára: Félix Fernández
 
Yma ñanemitãvépe jajoayhúmi añete,
guyramípa ha'ete oikóva oñoñe'ẽme,
térã yvoty apytépe ñáne ñe'ẽ ñamombo,
ha ovy'a ñáne korasõ upe memória rapykuéri.
Jajotopárõ ykuápe, ndéve ahupi kambuchi,
ha upévo rohetũmi mamo ikatumihápe,
ha aru va'erã che py'ápe upe ne ryakuãnguemi,
che akãngytápe amoĩ ahetũvo nde rayhupápe.
Amo tape kurusúpe che ñuhãmi aipyaha,
aha'arõ rehasa clavel poty nde jurúpe,
reju va'erã pukavýpe, ha he'ẽte nde guata,
pyku'ipe ja'eha oitypekárõ ojoypýpe.
Upérõ ndajaikuaái ko yvy apére oñaníva,
ñánde py'a omopirĩva, ñandémi ndajaroviái,
hi'ãnte jasapukái togueraha ku yvytu,
ha maymáva tohendu iporãha Paraguái.
Asajekue, pynandi, ñasẽmi jajeroky,
jaipo'o ku yvoty, ñamuña ku panambi,
ha ndémi nde saraki, che motuka'ẽ gua'u,
rehenóivo mborayhu, reñemokoni koni.
Ha áĝa jakakuaáma, rohecha nekuñataĩ,
che ndaha'éi mitã'i, ñánde vy'are opáma,
águi ñande jaháma ñandereitývo yvytu,
ha ipahaitéma rehendu che purahéi, Mária Ána.

www.guaranirenda.com - 2004

Péva mboyvegua Péva riregua