Che kuairũ resa (ñe'ẽpoty)

Haihára: Francisco Martín Barrios
 
Mba'e guasuetépa ko che akãme oikéva,
ajepy'apy ha ndavy'avéi,
che ke ha che páype nacherendavéi,
ndaikuaái voínte ko chéve ojehúva.
Kyhápe añeno jahechápa ake,
ha manterei añemyatymói,
che pijohapa, che y'uhéi, che remói,
ha ambojopyru kyha ha inimbe.
Asẽ ajeity pe kapi'ipépe,
che po mokõivépe añemoakãngyta,
mbyja oĩ háicha, maymáva aipapa,
jahechápa upéicha apyta akemi.
Ha ã che resa ikãmbarei,
oĩménte voi che akã ojo'óva,
ku kuairũ resáicha cherehe oikóva,
ñaimo'ã ohapýva pe che korasõ.
Kokuehe aháma ahecha pa'i,
hi'ãitégui upérõ añemombe'u,
ha he'ínte chéve: "Reporohayhu,
pohã paraguái, emenda voi".
Ha upévako hína chéve ojehúva,
Tupãsy memby che moakãnundúva,
ku oguatakuévo, pehecha nga'u:
ha'ete ipepóva ko anome'ũ.
Yvoty oĩ háicha okukúi hapépe,
pe humby otytýi, pe hesa omimbi,
ha nembotarováva, omymýiva ohóvo,
ikamisaguýpe, mokõi jeruti.
Hague rokyũmba pe hova yke,
hetyma kyrỹi porãite guasu,
ikambuchimi pako pe ijuru,
ha'érõ ichupe: "Ta'u che eirete".
Apoi nde ári yvytu pepo,
che ñe'ẽnguemi tohendu ha'e,
ko che mba'asy che resa rupi oike,
ha che korasõme ojehaitypo.

www.guaranirenda.com - 2004

Péva mboyvegua Péva riregua