Che irũ nguérape ĝuarã (ñe'ẽpoty)

Haihára: Basiliano Caballero Irala
 
Oryrýiva mborayhúgui,
Tupãsy ára jave
che purahéi, mombyrýgui,
pe nerendápe oĝuahẽ.
Okukuipa ñasaindýgui,
ha yvytu ryakũa porã
ojupíva yvotytýgui
ipepóre ogueraha.
Mbeguemi he'i haĝua
pende apysápe, irũ nguéra,
ndaiporiha ko yvy ári
ñáne retãicha ĝuarã.
Upévare, hayhupápe,
tekotevẽ ñaimemba
peteĩ py'a porãme
imbareteve haĝua.
Ha anive mba'e sa'íre
ojohuguy ñañohẽ,
ñamyatã jojapaiténe
ñasẽ haĝua tenonde!.
Mombyry jahejapa
py'a vai oñondive,
jareko va'ekue ymave
ñánde yvy mokangyha.
Tosoro pe yvy pytã
kóga ra'y rupaĝua,
mba'apo ha tyguatã
toguereko tetãgua.
Tory, pira ha vy'a
ñáne retã tuichakue,
taisarambi pya'ete
ñande po'ave haĝua.

Ñenohẽ hágui: [CIB1:62] - www.guaranirenda.com - 2004

Péva mboyvegua Péva riregua