Apytu'ũ poty poravo pyre (ñe'ẽpoty)

Haihára: Gumercindo Ayala Aquino
 
Ndaha'éi ao ñandeapóva.
Ñande jajapo ichupe.
Iporãmo térã osoróva,
ñandapére jarekóva.
Ha hyepýpe karameĝuáicha,
akóinte hína ñande.
Ndaha'éiri yvyguýpe
opytu'úva ityvýpe
añónte pe te'õngue.
Hi'ãnga ikusuguéva
yvy ári oikovéva:
Upéva avei ha'e.
Pe máva ohasa'ỹva
hekovépe tekotevẽ:
Jepémo iñarandúva,
ndoikuaái tavaygua rape.
Pe nde sýpe rehayhúrõ
nde po'a va'erã tapia,
nemandu'ánteke hese
reikotevẽ'ỹ aja.
Ani rejejahéi márõ avavére
reipota'ỹrõ ojejajéi nderehe,
ha ema'ẽ pe nde rekovére
reikeséramo ipype.
Ema'ẽ ha ejesareko,
tape potĩ eipykúi,
ani anga nepyrũ pyho
ha tujurykue nde rypýi.
Heñóiva ykua yvu
ysyry rehe oñani,
vokóinte ojo haĝua
para guasúpe okañy.
Upéicha avei ñande
arapýpe jasyryry,
jaha haĝua voiete
ñamboavevóma yvy.
Porã ha mborayhu,
umíva ojoyke'y.
Reheka'ỹre rejuhu,
rehecha'ỹre okañy.

Ñenohẽ hágui: [ToR1:119] - www.guaranirenda.com - 2004

Péva mboyvegua Péva riregua