Ysoindýpe ojehu va'ekue (mombe'urã)

Haihára: Basiliano Caballero Irala
 
   Oiko ndaje jevy peteĩ Ysoindy, michĩ ra'ymíva, eterei ońembosaraiséva ka'aru pytumby jave kapi'i pytãndýre ha arasa'i rakãre ojepysóva peteĩ ykua satĩ rovy ypýpe.

   Upéicha, pyhare ojayvývo, isaraki ágotyo, pégotyo, ndijai ku jasy rata'imi ojapichýva ohasa kuévo, capi'ipe rovyũ térã aratiku ńu hyakuãvu hikuái umi tape ykére.

   Are guive nipo oma'ẽ vai hese hikóni ra'e Jarara. Ohesa ko'õiterei ichupe ohecháramo Ysoindýpe hetia'e, omimbi ha isaraki opárupi ojapo'ỹre mba'eve ivaíva rehe.

Kóva ndikatúi oho péicha tenonde he'i pochýpe Jarara, ha tata mante oity hesa ha ikũgui opyryrỹiva ndijai ku mbokaja ratĩ.

   Ambue ka'arúpe, Ysoindy osẽ jevy, jepírõ guáicha, ohesape ha ombojere haĝua yvoty rakã, tuicháva ha michĩva, oĩva upe jere rehe, ha oguejývo peteĩ yvyra pirukue ári, ohape joko ichupe Jarara. Peteĩ tesapirĩme, ojeity hi'ári, omokõ haĝua voi ichupe.

   Ysoindy anga, tuichaiterei ońemondýi ha kyhyjepópe, he'i Jararápe:
Mba'e ivaietéva piko che ajapo nderehe ra'e, ajeve ko che mongu'ipase.
Remimbi, remimbieterei he'i ichupe Jarara.

 

   Ńama'ẽ porãramo ńánde ypýrupiko, heta jevy, jajuhu tekove ojoguáva Jararápe, ndopytu'úvai ombotyai, ojuka, térã ombogue haĝua ambue hapicha rekove; ipy'arógui, ha'e ndikatúvai ohupyty ha ombojoja.

Ńenohẽ hágui: [CIB1:82] - www.guaranirenda.com - 2004

Péva mboyvegua Péva riregua