Principal ] Historia ] Fonología ] Gramática ] Antología ] Dichos ] Misceláneas ] Fotografías ] Enlaces ] Autores ] Correo ]


Ñamindu'urãmi

Jasypo 4, 2006

 

Irũnguéra peiméva ko ñe'ẽ atýpe:

Ramoite Karai Joan Moles oguerukákuri ñandéve mbohapy Proyecto de Ley ha heta oiméne ñaime peteĩva ko'ã aty ombosako'iva'ekuépe.

Hi'ãiteva'erãningo chéve ñañamindu'u oñondivepa umívare ko'ápe, ha ikatuvéramokatu ñamoragẽmi –ñamboapurami– ñande mburuvichakuéra omoneĩva'erãme ojesareko haguã hese ha ojapysaka haguã ñane remiandúre, tavaygua py'arasy ñambogue mieve haguã.

Aréma Guarani ñe'ẽ oha'arõ, ha ñande hapykuéri, toñembojojami hekove castellano ndive ñane retã sambyhýpe opa mba'erã. Jepe jaikuaa léi año ndojapomo'ãi mba'eve, katu oipytyvõne katuete jajopy'imíramo osẽ porã haguã añetehápe, guarani oñakãrapu'ã haguã ko'ápe ñane retãme ha avei, mba'érepiko anichéne, tojekuaa oparupiete ha hese'ae ambue ñane retã ñe'ẽ ypykue ha Amérika ñe'ẽ ypykue ta'iñasãive ha toñepysyrõ.

Aikuaa heta tapicha he'iha guarani pepevéntema ikatuha oguahẽ, pepevéntema oikovéta, ndaikatuvéima okakuaa. "Mba'éicha jajapóta guaranínigui ñane retã rembiapo ñe'ẽ térã oimerãe tembiapo kate, ñemurã ha tetã rembijokuái hamba'e, ndorekóiramo ñe'ẽndy umivarã, ndorekóiramo ñe'ẽ arandu umivarã?"... ñahendu oje'e.

Chékatu ha'e guarani ikatúne okakuaa iñe'ẽndýpe, iñe'ẽ arandúpe ha ojepurukuaáne opa tembiaporãme. Ñanderehéntema oĩ. Jajukupyty, ñañomoĩ peteĩ ñe'ẽme ha jaha hese tenonderã... Umi tapicha katupyry, umi ñe'ẽpykuaahára ojoajúma guive ha ñande guarani jaipurúva, ñañe'ẽva ipype, jaikovéva, ñañandúva ipype, ñañatõimeméramo, ñamoñakãrapu'ãne katuete ñane ñe'ẽ, ñane retã ha mayma tapicha heko jejopývape.

Hasy'imi ko mba'épe ñaguãhẽ haguã... katu jaikuaava'erã ndajaku'eirõ ko'áĝa, ko'ẽrõ ndajaikuaái ikatúnepa.

Ko'ã mba'e ha'évaningo ñamindu'urãmínte, ndaha'éi pochyrã.

Che maitei maymavévape.

Perla Álvarez
perlaab@highway.com.py 

Tapicha nomoñe'ẽiva guarani, tacheñyrõmi ahaihaguére avañe'ẽmente. Oiméramo oĩ ombohasaséva castellano-pe ikatúntema ojapo.

www.guaranirenda.com - 2006

Péva mboyvegua - Página anterior Péva riregua - Página siguiente

Principal ] Historia ] Fonología ] Gramática ] Antología ] Dichos ] Misceláneas ] Fotografías ] Enlaces ] Autores ] Correo ]