Chokokue rembiasa (purahéi)

Ñe'ẽpoty ha pumbasy: Ciriaco Cardozo
 
Ko'ẽju poty kuru
ojekávo hesakãva,
imimbi ku iñasãiva
arapy ohesapepa,
ha hyakuã pyahu porã
yvytúre ñahetũ,
tetia'e ha'e oguerúva
omba'apóvape ĝuarã.
Omyangekói okaragua
kokueréro oñeñandúva,
torypápe oje'óiva
omopotĩ hemitỹrã,
javorái ha ka'aysa
kyre'ỹme oiguyrúva,
ko'ẽrõgua oñotỹva
oipota rupi iporã.
Hetaitéma jaheipópe
tapicha kuéra oikóva,
hy'ái kuérape ojahúva
kokueréro mboriahu,
omuñáva pytu'u
heruĝuárehe oikóva,
ku po'a ndaikatúiva
mba'evéicharõ ojuhu.
Mba'ehápa iñarandúva
ko arapy oikuaáva,
kokueguágui iñipytũva
noha'ãi omyesakã,
taipoty kuru jera
py'aguapy yvy ári,
topytu'u angatágui
chokokue, che retãygua.

Ñenohẽ hágui: [AMR2:92] - www.guaranirenda.com - 2004

Péva mboyvegua Péva riregua