Apytávo che'añomi (purahéi) |
||
| Ñe'ẽpoty: Ramón Mendoza Pumbasy: Eulogio Ayala - Ramón Mendoza |
||
|
Upe ára chereja, resẽ reho mombyry pytãmba upe kuarahy naiporãvéi pyhare, opa umi guyra ñe'ẽ nahyakuãvéi yvoty oime poku nembyasy avei che javeve. |
||
|
Che apytu'ũme akói oikóva upe ka'aru ha py'ỹinteva ypyahu chemandu'árõ hese, ku ñasẽramo guare jaguata mbegue katu upe tape kurusu jahupytyha peve. |
||
|
Mokõivéva japyta upérõ sapy'ámi ha umi nde resa mimbi ipaha che resape, che'añuávo ipahaite ere chéve mbeguemi aju jeýne voi ha ne'ĩra áĝa peve. |
||
|
Oime ku ñáne tapỹi ha'eñomíva opyta ñanandýpe oñeñua mba'e mbyasy memete, kunu'ũ heñói hague mainumby jerokyha ko'áĝaramo ĝuarã oiko chugui tapere. |
||
|
Amoaĝégui upe nde ju asẽ aha kokuehe ha aipe'ávo umi hokẽ tuichaite che'angapyhy, akói ára che reindy maymáva neryakuãngue upe koty omyenyhẽ osẽnguévo kuarahy. |
||
 |
 |
 |