Yvy ra'ỹi omymýiva (ñe'ẽpoty) |
|||
| Haihára: Gumercindo Ayala Aquino | |||
| Hasypevéko ha'éta che py'apýpe hatãva, aréma chemongetáva ko'áĝa péina ta'e, ñe'ẽ poravo pyre tahekýi che ñe'ãpýgui, ha anohẽvo che kũguýgui pende pópe tañohẽ. |
|||
| Yvypóra yvy ra'ỹiva sapyhápente jaikóva, taperã jaiporavóva ñama'ẽvo tenonde, ndajaikuaáiva ñande tenonderãme oĩva, ha upéicha jajepoíva jaipykúi ñánde rape. |
|||
| Ndajaikuaái mavavéva mamo pevépa jaháne, mamoitépa japytáne jajuhu pe pytu'u, jake, japáy, jakaru, jakái ha jachyryrývo, tapére jatyryrývo ñamuña pe yvytu. |
|||
| Maymávante yvy ári ñande kuéra ñaimo'ãva, kuatiágui ñaipovãva upevaha arandu, ñamongaru apytu'ũ heruĝuáva kuaaségui, ára resa rechaségui. Ha akóinte oĩ pytũ. |
|||
| Hetáko oĩ pe máva iko'ẽ imba'ekuaáva, pyhare omosakãva kuapaha rerekua, ha'eñónte oguata ha ha'ete oikuaapáva, arapýpe ohasáva... oikuaa'ỹva haperã. |
|||
| Jahasávo arapýre mayma ñañembotavývo, ñánde py'a ombohorývo ja'e ñanearanduha, upéichante jaikopa ha avave ndajaikuaáiri, araka'épa yvy ári... ñandekusuguetaha. |
|||
| Ha maymánte py'arópe ojoyke'y ojoykére, jaikojoa ojoapére ha jakaru ojuehe, ha ja'e ñandejehe jaikoha tesapysópe, jarekoha ñánde pópe ára resa pehẽngue. |
|||
| Ñandéko chéve ĝuarãrõ mymbami hesaite'ỹva, oñoñe'ẽ ñaikũmbýva ha aópe ñañemonde, mboriahu ỹrõ kate peteĩichaite mitãicha, aoguýpe karameĝuáicha akóinte hína ñande. |
|||
| Mba'e guasúicha jaikóva arapýpe jaguatávo... vy'apavẽ ñamuñávo, ha máva piko ñande. Ñandéko pe mba'eve jaikopáva ojoykére, yvy ra'ỹi pe tapére upéva hína ñande. |
|||
| Iporãvéne jaikórõ marangatu poru ãme, ha yvytu kuarahy ãme ñaipovã py'aguapy, anive jajohapy ojopopía ratápe, jaipotárõ aipo yvápe ñáne ãnga oguejy. |
|||
| Mymbáichante jaikokuévo hyvatã ha imboriahúva, yvy ape ñaikarãi, avave ndajahechái. Araka'épa osóta, ñánde rekove omanóta... avave ndajaikuaái. |
|||
 |
 |
 |