Yvotyty apyra'ỹ (ñe'ẽpoty)

Haihára: Carlos Miguel Jiménez
 
Che Retã'imíko tuvichapaite ijyvy porãme,
kuarahy ojope yvoty pytã, morotĩ, hovy;
ojupi jevýne katuetei yvate hu'ãme,
marõve voi ndahypa mo'ãi guarani ruguy.
Aniche va'erã tapykue opyta imba'e teéva
purahéi he'ẽ, jeroky rari, ha ñe'ẽ porã;
ipype oikove che Retã guasu, ymaite guaréva:
Topu'ã jevy ñánde ra'y kuéra rembiecharã.
Ñandejára, ipópe oñotỹ va'ekue
ka'aty hovýko ndopa mo'ãi;
hendive ipoty ñáne avañe'ẽ:
Ãichagua tetã naikangy va'erãi.
Anichéne yvy hetekue ojaty
ñáne Retãmi haperã ojuhu;
ndaipiru va'erãi ñánde yvotyty,
omimbipaite Paraguái pyahu.
Ku tape puku porãite asy ipyahúva hína
a Paraguaýgui oñepyrũva Guairápe oho,
kirirĩhaitépe heta mba'e ha'eño he'íma:
He'ise oimeháma ñáne Retãme ko ko'ẽ soro.
Ijyke mokõime ipoty kuru mborayhu ogue'ỹva,
kuimba'e ohypýi isyva ry'áipe ko'ẽ vove;
hendive heñói tuvichave haĝua mba'apo horýva
ikatúko upéi ñáne Retãmi imbareteve.

Ñenohẽ hágui: [GuA1:385] - www.guaranirenda.com - 2004

Péva mboyvegua Péva riregua