Yvága kañy (ñe'ẽpoty) |
||
| Haihára: Narciso R. Colmán | ||
| Ahecha va'erãpa, ahecha va'erãpa, ko Yvytymi chereñói hague, aimo'ã'ỹetére ojehejapa, ha óga opáva: Péina hendague!. |
||
| Umi ñu porãre, yvy porãitére ynambu sevóimi ypotypaite, ha yvytu kangymi hyakuã vevuimíva che py'a guivemi ahetũ va'ekue. |
||
| Pe yvyty ichovíva, ñanembovy'áva ku tajy potymi omopytãmba, ka'aguy hovýva ha ipotĩ porãva, ku yva ajúguimi, ojero'apa. |
||
| Jahámi upépe, ñanderetakuére, guavira ja'úvo, térã yvaviju, Yvaũ he'ẽvéva, arasa pytãva, ha ajaka ichovimi ku yvaporũ. |
||
| Guembe he'ẽtéva, ha aratiku péva, mbokaja ajúva ñañapĩ va'erã, ku inga ikuãmbáva, kamambu'imíva, ha ipoty porãva ku mburukuja. |
||
| Aguai jarúva, mba'e he'ẽrãva, ha ja'u porãva ku ñangapiry, jakarati'áje pohã guasuetéva, ha ku he'ẽtéva yvaporoity. |
||
| Jaha jaipo'ove mba'e he'ẽvéva, jate'i ku héra pe pohã guasu, apynguareínte ichupe ohasáva, tumbykyrasánte, ha eirusu. |
||
| Kóva apytépe jaiko ñaha'ãvo: Umi guyra kuéra ndaijapyravéi, ku oveve joáva, ñanembyetia'éva, ha ipurahéi kuéra... ku ndaja'eséi!. |
||
| Ápema mytũ, pépema jaku, mokõi kogoe ha ynambu guasu, karãu ha hoko, uru, chiriko, kagua, tataupa, ha ñanduguasu. |
||
| So'o ka'aguýva heta hetavéva: vira, mborevi, teju ha tatu, kuatĩ ha'eño, guasu pytãite, ku tañykatĩ ha tuĩtetu. |
||
| Ha áĝa ku opáma, sa'i jajuhúne, guyra jepevéma iñe'ẽngupa, ha yva ka'aguygua mamo oimevéne, oiko jepe'árõ, yma oje'upa!. |
||
| Upégui ipahápe ou "Los Partidos", ko'ãva Paraguáipe opartipaite. Ha imbaretevéva, hermano guivépe, mboka ratatĩme, omondopaite. |
||
| Vai vaivéva mba'e ojejapóva, hasýpe va'erãma oiko tesarái, ha taimbaretéke kasíke oikóva omoñyrõsérõ ko'ã paraguái. |
||
| Néi che ryvy kuéra: jaiko porãmbána, jajoayhupamína, peẽ kuimba'e, ñañopytyvóna topu'ã ñandéve, ko tetã'imi niko ñanemba'e!. |
||
 |
 |
 |