Yva reka (ñe'ẽpoty) |
||
| Haihára: Darío Gómez Serrato | ||
|
Jaha jahekávo ko yvy apére yvami he'ẽva nde juruichaite, arakue jaikóta ka'aguy mbytére ha ñúre ñasẽne pytũmba vove. |
||
|
Romoakãhojáta pakova roguépe ani nde syváre kuarahu okambu, ha nde pyti'a pacholi apytépe jajeity ojoapére ñaimo'ã yvytu. |
||
|
Jajupi gua'úne guavira rakãre kavichu pajéicha jajehaitypo, ha hogue apytépe iñipytũháre ñeñombojarúpe mokõive jaiko. |
||
|
Guaviju he'ẽva hykupa voíva re'ukáne chéve nde juru guive, che kũguy jopíva che ha'éne ndéve purahéi ne'ĩrava gueteri oje'e. |
||
|
Ajapóne ndéve hyapu mombyrýva mboichini ruguáigui nembo'yrãmi, ha "suelta con suelta" pytãva, hovýva, ne renypy'ãre tojere rei. |
||
 |
 |
 |