Py'aguapy (ñe'ẽpoty) |
||
| Haihára: Darío Gómez Serrato | ||
|
Pirĩ pirĩmbápe chembohuguyhóva péina oĝuahẽ chéve ne ñe'ẽpoty, ku pohã guasúicha mba'asy omombóva ha ome'ẽva chéve ko py'aguapy. |
||
|
Péichante voíko kuimba'e yvy ári reiko panambícha nde pepo yvytu, ha revevehápe reipotáva piári ñandu renimbóre rejepepo su'u. |
||
|
Umícha jave jajesa rupíva ha Ñandejárare ñanemandu'a, nde pyporekuépe tembiapo ivaíva tesarái haguéma jajora haĝua. |
||
|
Ijatýne upépe, rejejokuahápe kuña resay guive nde jo'o, opa hesatũva nera'ãne itápe yma ymave guaréne jeko. |
||
|
Che añomomirĩne tahyimi hekópe ambogue potávo che angaipa repy, Ñandejára rérape ahupi che pópe che japi hague tekove pochy. |
||
|
Apu'ã jevýne peteĩ ko'ẽme Tupãsy resápe chepotĩmive, ha roha'aróne che róga rokẽme panambi pepópe jevy añemonde. |
||
 |
 |
 |