Ñáne ñe'ẽ mba'erã (ñe'ẽpoty)

Haihára: Lino Trinidad Sanabria
 
Che ñe'ãgui otykýma eirete he'ẽvéva
ñe'ẽmi che arekóva aretéma añohẽse;
rasaite amomorãgui avañe'ẽ ijukyetéva
sapukáipe che ha'éva yvytúndie toveve.
Jahechápa noĝuahẽiri mombyrýva oĩháre
ñáne retãygua resáre tohecha iporãha;
chugui kuéraku oiméne okañýva, ndoikuaáire
hetave noñembo'éiri guarani yvotyha.
Ymavénte ikangýva yvytu nde pejuhára
ajevénte opa ára ndejehayhúi mamove;
péina áĝa ahecháre mbarete ne ne'ẽjára
hatãnguére oñeha'ãva, guaraníre iñarõve.
Nde rehe mante he'íne: "guaraní nde jukyetéva"
péva rehe ahayhuetéva aikuaáramo huguy;
jahecháma ipohýiva itanara tuichaitéva
petỹ hũgui irovéva, ha gua'u nanemovãi.

Ñenohẽ hágui: [GuA1:387] - www.guaranirenda.com - 2004

Péva mboyvegua Péva riregua