Mborayhu remitỹ (ñe'ẽpoty) |
||
| Haihára: Tomás Quiroga | ||
|
Epu'ã, ñemitỹhára, kuarahýko iñapysẽma tembiapo tekotevẽma nde kokuépe ipyahu; yvága momorandu hi'aĝui hi'aĝuivéma, gallo ahy'ópeko ipúma, ojekáva ko'ẽju. |
||
|
Yvatete ha nde guýpe nde rechaséva oĩre, ne angami hataidývana tahendy mimbipa; ne rymba tojejokua aradokue pohýire ha yvytu irundyvére toikytĩ pe nde yvy atã. |
||
|
Nde pókena taipojái ne korasõ rembiapóre ha yvy ipyko'ẽháre tahyapu pe nde guata; jahayhúva ko tetã, toĝuahẽ ichupe hi'ára ohechávo kóga kuéra nde kokuépe heñoimba. |
||
|
Eipotyvõ rejuhúva, oikotevẽva yvypóra, emonguera oñemyrõva tojuayhupa tetãygua; eipykúi tembiecharã, eipykúi ñemitỹhára ñañemitỹko maymáva ndaha'éi ne mba'erã. |
||
|
Ema'ẽnte tyre'ỹre Tupã nembo'e haguéicha, embo'e mitã itavýva, taipoapy mitãrusu; toñehẽ ne mborayhu tereikuaa'ỹ mamópa, toiko ku mba'e iporãva, ha nde terehecha'ỹ. |
||
|
Oñaníva herungua jekuaa'ỹguio oúva hekoverãre opu'ãva renondépe ejajái; nde rehénte taipojái omanóva ha oikovéva, ha yvytimbo repyrũva, tomokã pe nde ry'ái. |
||
|
Yvytu juasa rasẽ nde kóga kuerami ári hatã ikoe oipeju ou va'erã oharupa; ha umíva ndénte haĝua mborayhu ko arapýgui Tupã renda peve ohógui, hetaitevépe hekovia. |
||
|
Yvágagui oguejýva Tupã ñe'ẽnte ehendu; eñembo'e ha eñesũ ha yvy guive etupanói; ne ñemitỹko vokói hapo térã hi'apáva upe ne mba'e teéva nde neremono'õi. |
||
 |
 |
 |